Universitetet i Bergen
Frå 1500-talet var Hop setegard for lagmannen i Bergen og Gulen lagdøme. Fleire av lagmennene var adelege, slik som Hans Hansen Lillienskiold og Niels Knagenhielm. Den vakre hovudbygningen, som framleis står, vart reist av bergenskjøpmannen Thomas Erichsen i 1793-95. Han opparbeidde også ein storslått hage med ein 800 meter lang lindeallé ned til steinnaustet i Hopshavn.
Hovudhuset er eit staseleg byggverk i louis-seize-stil, med to vakre portalar og prydde søylerekkjer på tre sider, som ber mansardtaket. Bygget er eit glimrande eksempel på standarden i det bergenske handverket på denne tida. Vi må til Bogstad gard i Oslo, «Gimle» i Kristiansand eller «Nøisomheden» ved Molde for å finna stilmessige parallellar. Seinare er mansardtaket endra til halvvalm for å gje plass til loftsvindaugo. Bygningen, som er freda, var aldersheim fram til 2011, men er no i privat eige.
