Kvamskogen

Under kollisjonen med Grønland for over 400 millionar år sidan vart ulike bergartseiningar, skyvedekke, stabla oppå kvarandre. Dei som vart slitne av jordskorpa nærast, hamna under dei som kom langvegs frå. På toppen av kaka i det meste av Hordaland ligg dei langtvandra og framandvorne skyvedekka. Desse såkalla eksotiske bergartane er grønlege og kjem frå eit gammalt havområde som fanst mellom Grønland og Noreg i kambrosilurtida. Men på Kvamskogen og i fjella nord for Norheimsund og Øystese er den geologiske lagpakken snudd på hovudet. Dei eksotiske bergartane ligg ikkje øvst, slik dei har for vane – i desse områda kviler andre bergartar oppå dei grønlege bergartane;det er skyvedekka i Bergsdalsdekka som tronar høgast på Kvamskogen.

Den snudde kaka viser særleg godt att i Steinskvanndalen. Vegen inn i dalen ligg på dei eksotiske, grøne bergartane (glimmerskifer og grønskifer). Fjella rundt er grunnfjell tilhøyrande Bergsdalsdekka, som ligg oppå dei grøne bergartane.

Grunnen til denne lagdelinga er ei stor overfalding under fjellkjededanninga. Overfaldinga førte til at ei svær tunge av Bergsdalsdekka vart falda inn i dei overliggjande eksotiske bergartane. Berre den underste delen av denne tunga viser att i vår tid. Dei kvartsrike og harde bergartane i Bergsdalsdekka ligg att og dannar vakre fjellparti over dei grøne bergartane.